Joomla 1.5 Template By Youjoomla.com

TIAKO IANAREO

Na ho lavitra izany diako

Na mbola tsy haiko izay ho ampitsoko

Tiako ho re sy fantatrareo

Fa tsy misy foiko ianareo

Na mbola maro ireo sedra

Na mbola ho be ny hisetrasetra

Tsy hisy hahasakana ahy hiteny

Fa tiako ianareo, ianareo irery

Na maro ireo milaza ho tia

Milaza ho tena mpankafy

Tsy hoe tsy hinoako sanatria

Fa mbola hafa ihany ianareo satria

Na tsy mba haiko ny miteny

Sy milaza ombieny ombieny

Izay ato am-poko samirery

Dia tiako ianareo ry Dada sy Neny