Joomla 1.5 Template By Youjoomla.com

NOFY

Misy nofy iray tsy mba mety ho tanteraka

Mananihany mafy, indraindray toa mila handreraka

Maneso, mahakamo, toa mampivalaketraka

Tsy mety tanterahin'ity tany mpietraketra

Misy eritreritra heverina ho mety

Heverinao ho tsara sy hotontosa vetivety

Saingy angamba mihitsy fa hafahafa loatra

Matoa tsy mety tò, tsy efa ka mampitroatra

Misy hevi-dalina kobonina ao anaty

Mila handrotirotika sy mila hahafaty

Mampitsiry hevitra, nefa hevi-dratsy

'Zay ny hiafarany, ho tanteraka atsy ho atsy

Misy eritreritra alefa nefa foana

Misy haingam-panahy indraindray tonga tsy nahy

Misy koa fitia te hamono ny fotoana

Misy sandry te hiainga mafy koa fa toa tsy sahy

Fa mbola misy kosa nofy iray tsy mba kanosa

Nofy sahy hiady sy hiatrika ny ankaso

Nofy mamy, nofy ratsy, nefa nofy ihany kosa

Mbola hivadika ho fiainana ihany fa andraso