Joomla 1.5 Template By Youjoomla.com

OMEO INSPIRAKA

Hitantarao fiainana aho hanainga ny inspiraka

Fa na ny peniko aza toa efa drodroka sy vizana

Hitorio fitiavana aho na hilao ady kely

Fa Tsy mahita hosoratana, tena tsy lainga velively

Hilazao vaovao aho, hitantarao zava-maro

Tsy maninona io na lainga na koa aza hoe angano

Hihirao hira malahelo aho, hitantarao ny hafalianao

F'izany no manainga ny fanahy mpikalo ao anatiko ao

Omeo inspiraka aho fa te hanoratra ny peniko

Saingy efa lany voatanisa izay mba tsiambarateloko

Omeo ainga avy aminao aho, omeo inspiraka vaovao

Hamohazako ny fo mpikalo toa matory anatiko ao

Izay ary aho fa tsy mahita holazaina intsony

Nefa ny saiko mivezivezy, ny fanahy tsy mety tony

Mamisavisa, maminany, miezaka mandefa fisainana

Miezaka mitady teny enti-mitantara izato fiainana