Ry fireneko

Navigation

Recherche

Connexion

Ry fireneko

Lundi, 26 Juillet 2010 16:33 Talenta Kanto

RY FIRENEKO

Eny ekeko, ry Fireneko
Fa mahaleo tena ianao izao
Afaka ny gadranao
Ka akory ity ho atao?

Eny ekeko, ry Fireneko
50 taona izay no lasa
Ka ny vita sy kinasa
Moa mba efa voarasa?

Eny ekeko, ry Fireneko
Fa tsy ambany zioga intsony ianao
F'efa miarin-doha, mahay mikomy
Mitaky izay ho anjaranao
Dia ho inona ny tohiny?

Eny ekeko, ry Fireneko
Fa afaka tokoa ianao
Saingy ny vahoakanao
Manao ahoana?
Ambarao!

Eny ekeko, ry Fireneko
Ny fahaleovan-tenanao
Ary mbola antenaiko
Mbola hivoatra noho izao
Ny hoavin'ny taranakao

Nefa,
Ataoko ahoana no fijery
Ireto olo-marobe
Tsy mety sitrana, tsy afa-pery
Tsy mba mahita izay ho aleha?

Ataoko ahona no hikipy
Tsy hijery ireo zava-misy
Fahantrana, fizarana, halozana
Setrasetra, hasomparana mameno ny tanàna?

Eny ataoko ahoana moa
Ny hifety raha toa
Ka maro amin'ny Malagasy
No mandry fotsy, tsisy vatsy?

Eny ekeko ry fireneko
Fa mahaleo tena ianao izao
Saingy moa mba tsapanao
Hoe hatraiza moa ity fahaleovan-tenanao?